Ek din sharmaji ki lottery lag gayi. Pehli baar itna paisa zindagi me aaya to sharmaji ki khushi ka thikana na tha par is hisab me pareshan bhi the ki ab kya kya karna hai. Sharmaji ko ek baat humesha khatakti thi ki wo uneducated reh gaye. To unhone socha ki pehla kaam to ye karna hai ki apne ladke ka sheher ke best school me admission karwana hai jahan wo koi foreign bhasha bhi seekh jaaye. Arey bhai foreign ki bhasha ki dhaak hi alag hoti hai, bhale hi jis desh ki bhasha seekhe wahan kabhi jaana bhi na ho par apne mohalle ke logon ke beech to jhaad sakte hain. Aur gyaan jhaadne ka maza to hai bhi usi ke samne jise zyada na pata ho. To sharmaji pahunche International School aur karwa diya apne ladke ka dakhila. Kaha ki mere ladke ko sabse badhiya wali, sabse alag foreign language sikhao aur paise ki koi chinta na karna!! School walon ne bola ki bilkul aap jo bataaye, humare yahan saari european languages ke sath chinese aur japanese bhi sikhate hain. Ab sharmaji to kya hi jaane ye sab. Wo phir se bus itna hi bole ki sabse badhiya wali, sabse alag!
Aaj zyadatar logon ki soch bhi sharmaji jaisi hi hai. Pata nahi kya chahiye bus kuchh alag, dusro se badhiya! Aur isi chakkar me hum apni koi identity bana hi nahi paate kyunki humara jo kuchh bhi hota hai wo kisi dusre ke hone se hi banta hai. To bhaiya zara shanti se baith kar socho, ki jitna kuchh bhi chahte ho wo apne liye chahte ho ya dusro se alag hone ke liye, kyunki maze ki baat to ye hai ki jis din hum usme khush ho jaaye jo hum hain hi to apne aap alag ho jaayein. Aur shayad yehi hai sahi tareeka…zindagi jeene ka!!