Sharmaji apne ghar se daftar ki taraf nikle the. Raaste me ek qabr padti thi jahan se unka roz guzarna hota tha. Par aaj unhone wahan se guzarte waqt dekha ki unki padosan, jinke pati kal hi guzar gaye the, wahan qabr ke samne baithi thi aur uske upar pankha dola rahi thi. Sharmaji bade surprised huye ki bhai aaj ke zamane me itna gehra pyaar. Unse raha na gaya aur wo apni padosan ke paas ja kar unki tareef karne lage ki ‘bhabhiji wife ho to apke jaisi’. ‘Bhaisahab na rahe par apka pyaar itna gehra ki unki qabr ki sewa me lagi hain, dhanya hain aap!’ Unki padosan sharmate huye boli, ‘Ab aap se kya chhupana. Ye humse keh gaye the ki jab tak meri qabr ki mitti sukh na jaaye dusra nikah na karna! To bus…’
Aksar aisa hota hai ki insan kuchh dusre ke liye bhi karta hai to usme apna kucch benefit hi dekh raha hota hai. Lekin bhabhiji ki tarah ye baat wo manna nahi chahta. Humein ye ginaane me bahot maza aata hai ki hum kitna kucch karte hain dusro ke liye, par kyu karte hain is sach ko daba jaate hain. Arey bhai maine kiya hai, kya aap mujhe itna matlabi samajhte hain ki bina matlab kuchh na karunga! Humari khud ke baare me ye misunderstanding badhati hai humari ego, humari expectations. Aur fir badhti hai tension, kalesh aur jaane anjane hum bulawa dete hain kitni bimariyo ko. Thoda ruke aur dhyaan se dekhe ki jo karte hain kyu karte hain aur fir khud se to sach hi bole. Aur shayad yehi hai sahi tareeka…zindagi jeene ka!!